Thursday, December 4, 2008

വീരമണി ഫ്രം വീരസ്വര്‍ഗം പറയുന്നതെന്തെന്നാല്‍.. ..

മാന്യരേ ഞാന്‍ വീര സ്വര്‍ഗത്തില്‍ നിന്നും വീരമണി എഴുതുന്നു. ഭൂമിയില്‍ നിന്നും പോന്നിട്ട് ഒരാഴ്ച ആയെങ്കിലും ഇന്നലെയാണ് ഇവിടെ എത്താന്‍ സാധിച്ചത്. ഭൂമിയിലെ കര്‍മങ്ങള്‍ ഒന്നും ശരിയായ രീതിയില്‍ നടത്താതതിനാല്‍ വീര സ്വര്‍ഗത്തിലേക്കുള്ള വിസ കിട്ടാന്‍ അല്പം താമസിച്ചു. കഴിഞ്ഞ ആഴ്ച ബോംബെയില്‍ നിന്നാണ് ഞാന്‍ ഇങ്ങോട്ട് വന്നത്. എന്നെ കൊണ്ടുപോരാനായി വന്ന വീര സ്വര്‍ഗത്തിന്റെ സ്ഥിരം വണ്ടിയായ പോത്തന്‍സ് ട്രാവല്‍സില്‍ മുംബെയില്‍ നിന്നും കയറിയ എന്നെ വീര സ്വര്‍ഗത്തിന്റെ മെയിന്‍ ഗേറ്റില്‍ ഇറങ്ങിയ ഉടനെ വീര സ്വര്‍ഗം കാവല്‍ക്കാര്‍ 'നടയടി' അടിച്ച് എതിരേറ്റു. ഞാന്‍ മുംബെയില്‍ നിന്നാണ് വരുന്നതു എന്നറിഞ്ഞ അവര്‍ വീര സ്വര്‍ഗത്തിന്റെ ഓണര്‍ ആയ ശ്രീമാന്‍ കാലന്‍ സിങ്ങിനെ വിവരമറിയിക്കുകയും മേല്‍പടിയാന്‍ തന്‍റെ ഒന്നാം നമ്പര്‍ പോത്ത് കാറില്‍ മെയിന്‍ ഗേറ്റ് വരെ വന്നു എന്നെ സ്വീകരിക്കുകയുമുണ്ടായി.

ഇവിടെ എനിക്ക് വളരെ നല്ല സ്വീകരണമാണ് ലഭിച്ചത്. എല്ലാര്‍ക്കും അറിയേണ്ടത് എങ്ങനെയാണു ഞാന്‍ ഉഗ്ര വാദികളുമായി ഏറ്റുമുട്ടിയത്, എത്ര പേരെ കാലപുരിയിലേക്ക് പാക്ക് ചെയ്തു, ഉഗ്രവാദികളെല്ലാം പാകിസ്താന്‍കാര് തന്നെയാണോ എന്നൊക്കെയാണ്. കഴിഞ്ഞ കാര്‍ഗില്‍ യുദ്ധ സമയത്ത് വീര സ്വര്‍ഗം പൂകിയ കുറേപ്പേരെ ഞാനിവിടെ കണ്ടു മുട്ടുകയുണ്ടായി. അതില്‍ കുറച്ചു പേരെ എനിക്ക് നേരത്തെ അറിയാമായിരുന്നു. അവരൊക്കെ പഴയതിലും തടിച്ചിട്ടുണ്ട് കേട്ടോ. വീര സ്വര്‍ഗത്തില്‍ ഭക്ഷണമൊക്കെ അടിപൊളിയാണത്രെ!

ഏതായാലും ഞാന്‍ എനിക്ക് കിട്ടിയ മുറിയില്‍ എത്തി. ഒരു കുളിയൊക്കെ പാസാക്കി. എന്നിട്ട് അല്പം സ്പ്രേ ഒക്കെ അടിച്ച് കുട്ടപ്പനായി. അപ്പോഴാണ്‌ അവിടെ കിടന്ന ഒരു ഹെവന്‍ ടൈംസ് പത്രം ഞാന്‍ കണ്ടത്. അതിന്റെ മുന്‍ പേജില്‍ തന്നെ എന്റെ ഒരു ഫോട്ടോ കണ്ട ഞാന്‍ അന്തം വിട്ടു പോയി! അതിറെ അടിയില്‍ എഴുതിയിരിക്കുന്നു " വീരമണിക്ക് ജന്മ നാടിന്‍റെ പ്രണാമം"അത് കണ്ട എന്റെ ബോഡിയിലെ സകല രോമവും എ കെ 47 തോക്കിന്റെ ബാരെല്‍ പോലെ എഴുനേറ്റു നിന്നു.

ഞാന്‍ ടി വി ഓണ്‍ ചെയ്തു. അപ്പോഴതാ കാലന്‍സ്നെറ്റിലെ ന്യൂസ് ചാനെലില്‍ എന്റെ കാര്യം സംസാരിക്കുന്നു. അഞ്ചാറു പേര്‍ അവിടെയും ഇവിടെയും ഒക്കെ ഇരുന്നു സംസാരിക്കുകയാണ്. അതിനിടയില്‍ ആരോ പട്ടിയെന്നോ പൂച്ചയെന്നോ ഒക്കെ പറയുന്നു. എന്റെ കാര്യത്തിനിടയില്‍ ഈ പട്ടിയും പൂച്ചയും എവിടെ നിന്നു വന്നു. വീട്ടില്‍ ഞാനൊരു നാടന്‍ പട്ടിയെ വളര്‍ത്തിയിരുന്നു. ഇടയ്ക്കെപ്പോഴോ അതിനെ കാണാതെ പോയി. ഞാന്‍ കുറെ അന്വേഷിച്ചു. ഒടുവില്‍ എന്റെ പട്ടി വീടിനടുത്തുള്ള പയസ് ഒമ്പത് എന്ന വീട്ടിലെ പെണ്‍ പട്ടിയുമായി എന്തോ ഗുലുമാല്‍ ഒപ്പിക്കുന്നത് ഞാന്‍ കണ്ടു. കൂടെ വേറെ ഒരു പട്ടിയും ഉണ്ടായിരുന്നു. അതോടെ ഞാന്‍ ആ അന്വേഷണം അവസാനിപ്പിച്ചതാണ്. ആ പട്ടിയങ്ങാനും തിരിച്ചു വന്നോ? അതാണോ ഇവര്‍ പറയുന്നതു?

കുറച്ചു കഴിഞ്ഞപ്പോള്‍ അതാ ഭൂമിയിലെ ഒരു ലൈവ് സീന്‍ കാണിക്കുന്നു. അതില്‍ പ്രതിപക്ഷ നേതാവാണ്‌ കാണുന്നത്. രാജി വച്ചേ പറ്റൂ ...അദ്ദേഹം ഊന്നി ഊന്നി പറയുകയാണ്‌. ആര് രാജി വയ്കാനാണ് ഈ പറയുന്നതു. എവിടെയാണ് കുഴപ്പം ? എനിക്കൊന്നും മനസ്സിലാകുന്നില്ല. കുറച്ചു കഴിഞ്ഞപ്പോള്‍ അതാ ആരാധ്യനായ മുഖ്യമന്ത്രി വരുന്നു. അദ്ദേഹം എന്താണ് ഊന്നി പറയുന്നതറിയാന്‍ ഞാന്‍ കാതോര്‍ത്തു. അദ്ദേഹം പറയുന്നു. "വളരെ വ്യക്കുതമായി പറയുകയാണെങ്കില്‍.... ...................... ക്ഷമ ചോദിക്കുന്ന പ്രശ്നമില്ല." ആരോടാണ് അദ്ദേഹം ക്ഷമ ചോദിക്കേണ്ടത്‌?? എന്താണ് പ്രശ്നം?

പെട്ടെന്ന് ടി വി യിലെ സീന്‍ മാറുന്നു. എന്‍റെ വീടാണല്ലോ അത്? അച്ഛനല്ലേ ആ കാണുന്നത്? അദ്ദേഹത്തിന് ഇതെന്തു പറ്റി? വീടിനു പുറത്തു കൂടി വെരുക് പോലെ നടക്കുകയാണല്ലോ? കൂടെ ആരൊക്കെയോ ഉണ്ട്. അദ്ദേഹവും 'പട്ടി പട്ടി' എന്നൊക്കെ പറയുന്നുണ്ടല്ലോ? അപ്പോള്‍ പ്രശ്നം എന്‍റെ വീട്ടില്‍ തന്നെയാണ്. എങ്ങനെ അറിയും?എന്റെ മൊബയിലില്‍ റേഞ്ചും കിട്ടുന്നില്ല. തന്നെയുമല്ല റോമിങ്ങിലാണ് താനും.

ഞാന്‍ ചാനെല്‍ മാറ്റി. ഒരു പെണ്‍ കൊച്ചു വില്ല് പോലെ വളഞ്ഞു നിന്നു ഘോര ഘോരം സംസാരിക്കുന്നു. ഹിന്ദിയിലാണ് സംസാരം. ഞാന്‍ ശ്രദ്ധിച്ചു. അത് ശരി. അപ്പോള്‍ അതാണ്‌ കാര്യം അല്ലെ? പ്രിയ നേതാക്കളെ എന്തിനാണ് നിങ്ങള്‍ ഈ നാടകം കളിക്കുന്നത്? നിങ്ങള്‍ പരസ്പരം കുറ്റം പറഞ്ഞു കൊണ്ടിരുന്നപ്പോഴല്ലേ ലവന്മ്മാര്‍ പുറകിലൂടെ വന്നു പണി പറ്റിച്ചത്.? ജനത്തെ സംരക്ഷിക്കേണ്ട ചുമതല നിങ്ങള്‍ മറന്നില്ലേ? അവസാനം അതിന് എന്നെപ്പോലെയുള്ള വീര മണികള്‍ ഡല്‍ഹിയില്‍ നിന്നും വരേണ്ടി വന്നില്ലേ? ആ ജോലിയും ഭംഗിയായി തീര്‍ത്തിട്ടാണ് ഞാന്‍ വീര സ്വര്‍ഗത്തിലേക്ക് പോന്നത്.

ആയതിനാല്‍ എന്നെ ഇനിയെന്കിലും വെറുതെ വിടുക. ഞാനിവിടെ സമാധാനമായി കഴിഞ്ഞോട്ടെ. നിങള്‍ ക്ഷമ പറയുകയോ പറയാതിരിക്കുകയോ ചെതോളൂ. പക്ഷെ എന്റെയും എന്റെ നാട്ടിലെ ജനങ്ങളുടെയും ക്ഷമയെ പരീക്ഷിക്കരുത് ..പ്ലീസ്